Par: Med Najib Trimasse


البلاد دواور ودشور،

غابات وبحور،

برارك وديور،

معقول،خيانة وجور،

حالة دواري ضوارة

ريحة الشياط منو فوارة

الفقر والفساد دار خبلة فالحارة

نفرو الولاد وهربو عند الجارة

مندبة ف ذيك الدوار

مندبة ف هذاك وذاك

مندبة وحتى في هذاك

 

دشرتي صحرا،لا ما لا نعمة

الجهل فيها والبطالة بالجملة

شحال من وعد ف كل حملة

ولا واحد ف الكلمة

مندبة في ذيك الدشرة

مندبة في هذيك وذيك

مندبة حتى في هذيك

 

غابات بلادي كثيرة

حطبها يد في الكروش الكبيرة

وحشها يضربو عليه الويسكي والبيرة

و أنا و امثالي عايشين فالحيرة

مندبة ف الكروش الكبيرة

مندبة في هذيك وذيك

مندبة وحتى في هذيك

 

بحورنا طويلة وعريضة

شواطئ وحيتان فريدة

الرمل خوصصوه،تشمش فيه النفوس المريضة

والحوت بيه يجيبو العملة م البلاد البعيدة

و أنا و انت نتمارسو على كديدة

وكل مرة نكولو حتى تجي الحكومة الجديدة،

تزول الضيم منا والغبينة

وتكون لكل محروم أم حنينة،

لكن حليب الأم تمخض بلا مخيض

وسمم البدين وقتل المريض

القروقة تعيى تقاقي وبلا بيض

مندبة ف كل قديم وكل جديد

مندبة في هذيك وذيك

مندبة حتى في هذيك.

 

علاش شي ساكن ف ديور

واش من ديور هوما...

وشي ساكن فبرارك

واش فرارج هوما؟

علاش شي يغرس بحالي وبحالك

وشي يرد ف الآخر اللومة؟

علاش بغاو يجوعو الحومة؟

علاش...؟ علاش...؟

علاش باغيين تحكمو غير نتوما؟

علاش...؟علاش...؟

واش اللي داز ما كفاش؟

واش كلشي كباش؟

ولا نتوما حناش؟

سر البحيرة تفتاش،

باش يبانو صحاب الهمة

ويظهرو مشتتين اللمة،

بغينا نطويو الماضي زعمة،

بغينا قلوب الرحمة،

بغينا ليلنا تضويه شمعة،

بغينا عين بلا دمعة،

بغينا خير وسلام الشبعة،

فنظركم،هاذ الشي ممكن يكون؟

ولا حتى يفنى الكون؟

 

--

محمد نجيب اطريمس.

        

                           Cliquez ici pour plus de détails !
 

                                   

 

Creer un Forum

Créer un site gratuit avec e-monsite - Signaler un contenu illicite sur ce site

×